បុរសម្នាក់ស្រវឹងស្រាខ្លាំង បើករថយន្តមួយគ្រឿង ជ្រុលទៅបុករបាំងថ្មពុះចែកទ្រូងផ្លូវ បណ្ដាលឱ្យបាក់អស់មួយកង់
ភ្នំពេញ ៖ កាលពី ថ្ងៃទី១០ ខែសីហា ឆ្នាំ២០២៣ បុរសម្នាក់ស្រវឹងស្រាខ្លាំងបានបើករថយន្តមួយគ្រឿងយ៉ាងលឿន ខណៈដល់ផ្លូវកោងមិនប្រយ័ត្នជ្រុលទៅបុករបាំងថ្មពុះចែកទ្រូងផ្លូវបណ្ដាលឱ្យបាក់អស់មួយកង់ រីឯរថយន្តបានរេចង្កូតមកខាងស្ដាំដៃជ្រុលទៅបុករបងច្រកចូលផ្ទះពលរដ្ឋក្រឡាប់ផ្ងារជេីងទ្រមេឃ នៅត្រង់ចំណុចមុខវិទ្យាល័យជាស៊ីម សាមគ្គី តាមបណ្ដោយផ្លូវលេខ២៧១ ក្នុងសង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ។
ដំបូងឡើយគេឃើញរថយន្តម៉ាក TOYOTA VIOS ពណ៌ស ពាក់ស្លាកលេខ ភ្នំពេញ2AN-4356 បើកបរដោយបុរសម្នាក់ធ្វេីដំណេីរតាមបណ្ដោយផ្លូវលេខ២៧១ ក្នុងទិសដៅពីលិចទៅកើតយ៉ាងលឿន ខណៈមកដល់ចំណុចកើតហេតុខាងលើដោយសារតែផ្លូវកោងផងគួបផ្សំនឹងល្បឿនលឿនផង មិនប្រយ័ត្នក៏ជ្រុលទៅបុករបាំងថ្មពុះចែកទ្រូងផ្លូវបាក់អស់មួយកង់ ហើយរថយន្តក៏រេចង្កូតមកខាងស្ដាំដៃទៅបុកជញ្ជាំងរបងច្រកចូលផ្ទះប្រជាពលរដ្ឋបណ្ដាលឱ្យរថយន្តក្រឡាប់ផ្ងារជើងឡើងលើតែម្ដង។ ភ្លាមៗនោះគេឃើញអ្នកបើកបរបានលូនចេញពីក្នុងរថយន្តមានសភាពស្រវឹងស្រា និងបានចាកចេញពីកន្លែងកើតហេតុ បាត់ស្រមោលតែម្តង ៕
